Norðurlandaráð samþykkir íslenska tillögu um leit að lækningu við mænuskaða
Íslensk tillaga um skipulagða leit að lækningu á mænuskaða var samþykkt rétt í þessu á þingi Norðurlandaráðs í Kaupmannahöfn. Siv Friðleifsdóttir, formaður velferðarnefndar Norðurlandaráðs, mælti fyrir tillögunni, sem var samþykkt einróma.
Auður Guðjónsdóttir, stofnandi Mænuskaðastofnunar Íslands, átti frumkvæðið að því að koma tillögunni á dagskrá hjá Norðurlandaráði. Siv Friðleifsdóttir og Íslandsdeild Norðurlandaráðs hafa fylgt málinu þétt eftir á hinum norræna vettvangi, með dyggum stuðningi Jóhönnu Sigurðardóttur forsætisráðherra og ríkisstjórnarinnar. Í gær afhenti Siv Bertel Haarder, forseta þings Norðurlandaráðs, undirskriftir 8500 íslenskra kvenna um að Norðurlönd taki forystu í skipulagðri leit að lækningu við mænuskaða.
Efni tillögunar sem Norðurlandaráð hefur nú samþykkt er að starfshóp lækna og vísindamanna verði settur á fót til að skoða norrænar og aðrar rannsóknir og meðferðir við mænuskaða og gera tillögur til úrbóta. Markmiðið er að starfshópurinn skoði þá vísindaþekkingu sem nú er til staðar á heimsvísu og athugi hvort mögulegt sé að samnýta þekkinguna til að þróa lækningastefnu fyrir mænuskaða, en engin lækningastefna er til.
Auður Guðjónsdóttir, sem er hjúkrunarfræðingur og móðir stúlku með mænuskaða segir í framhaldi af samþykkt Norðurlandaráðs að ef rétt verði að staðið að þá muni Norðurlöndin gera mannkyninu mikinn greiða með því að beita sér fyrir samnýtingu þekkingar á þessu sviði og það muni ekki aðeins gagnast mænuskaða heldur öllu taugakerfinu. Auður segist vera einkar stolt af því að Íslendingar og sér í lagi íslenskar konur hafi átt frumkvæði að því að gefa mænuskaða rödd á alþjóðavísu. Við sáum hve vel það gagnaðist Eystrasaltsríkjunum þegar Íslendingar ljáðu þeim rödd sína á alþjóðavísu í sjálfstæðisbaráttu þeirra segir Auður og segir að það sé einmitt hlutverk lítilla þjóða að beita sér í þágu mannkyns á þennan hátt.