Um Mænuskaðastofnun Íslands
Mænuskaðastofnun Íslands var stofnsett árið 2007 að frumkvæði Auðar Guðjónsdóttur hjúkrunarfræðings. Helsta hlutverk stofnunarinnar er að vekja athygli á mænuskaða á alþjóðavísu og á nauðsyn þess að þjóðir heims taki höndum saman svo lækning finnist við honum.
Hugsjón Auðar er sú að þeirri vísindaþekkingu á mænunni sem nú þegar er til staðar verði safnað á einn stað og skoðuð ýtarlega af viðurkenndum læknum og vísindamönnum. Hennar trú er að mikil þekking sé til sem ekki nýtist því fólki sem mænuskaða hlýtur og með því að safna saman þekkingarbrotum frá víðri veröld og skoða heildarmyndina að þá megi móta lækningastefnu fyrir nýskaða fyrr en ella.
Stjórnvöld á Íslandi aðstoða Mænuskaðastofnun við að vekja athygli á málstaðnum hjá ýmsum alþjóðastofnunum s.s. hjá WHO, Evrópuráði og hjá Norðurlandaráði. /sjá neðar. Undanfarin ár hefur Mænuskaðastofnun Íslands safnað upplýsingum um tilraunameðferðir sem framkvæmdar eru á fólki sem hlotið hefur mænuskaða, hvar í veröldinni þær eru framkvæmdar og af hverjum. /sjá gagnabanka um mænuskaða hér á síðunni.
Fréttir frá Mænuskaðastofnun
16.12.2011
Eins og ýmsum er kunnugt samþykkti Norðurlandaráð íslenska tillögu um mænuskaða á þingi sínu í nóvember sl.
Efni tillögunnar var að ráðið setti á laggirnar starfshóp lækna og vísindamanna með það hlutverk að skoða þá vísindaþekkingu á mænunni sem nú er til staðar og skoða hvort mögulegt væri að samþætta hana svo að leggja mætti skipulagðan grunn að þróun lækningastefnu fyrir mænuskaða. Þessi góði árangur náðist vegna ötullar vinnu og samstöðu Íslandsdeildar Norðurlandaráðs, forsætisráðherra og 8.500 íslenskra kvenna sem rituðu nöfn sín í bænaskrá sem Siv Friðleifsdóttir formaður velferðarnefndar Norðurlandaráðs afhenti forseta ráðsins með glæsibrag á þinginu.
meira
3.11.2011
Íslensk tillaga um skipulagða leit að lækningu á mænuskaða var samþykkt rétt í þessu á þingi Norðurlandaráðs í Kaupmannahöfn. Siv Friðleifsdóttir, formaður velferðarnefndar Norðurlandaráðs, mælti fyrir tillögunni, sem var samþykkt einróma.
meira